Chwilio ffurf

Matayu 1

Pitiiŋ to Yesu pughu toni

[Lu 3:23-38]

1Nene pitiiŋ to Yesu Krisi pughu toni. Yesu, ye siŋ to kinik David, ve David, ye siŋ to Abaraam. Mbnp 22:18

2Yesu pughu toni to Abaraam ve inim imuul izi David, tauto izadi tovene: Abaraam natu Isak, Isak natu Yakop, ve Yakop ndinatu, nene Yuda toman nditogha ve nditazi. Mbnp 21:3, 25:24+

3Yuda yesuru Tamar tipoop ndinatudi ru, izadi Peres ve Sera. Peres natu Ezron, ve Ezron natu Ram. Mbnp 38:27+; Rut 4:18+

4Ram natu Aminadap, Aminadap natu Nason, ve Nason natu Salmon. 5Salmon yesuru Reap tipoop Boas, ve Boas yesuru azuwa Rut tipoop Obet. Obet natu Yesi, 6ve Yesi natu, nene kinik David. David ivai Uraia azuwa Batseba, ve yesuru tipoop Solomon. 2Sam 12:24

7Solomon natu Reoboam, Reoboam natu Abia, ve Abia natu Asa. 8Asa natu Yosapat, Yosapat natu Yoram, ve Yoram natu Usia, 9Usia natu Yotam, Yotam natu Aas, ve Aas natu Esekia. 10Esekia natu Manase. Manase natu Amon, ve Amon natu Yosia. 11Yosia ndinatu, nene Yekonia toman nditazi pida. Sawa tonenen, yes Babilona tinim tireu ndug tintina tisob to yes Yuda, ve tiyou di ve tigham di tila tivot ndug todi to ineep mala kat. 2King 24:14+

12Sawa to yes Israela tinepneep izi Babilon, Yekonia yesuru azuwa tipoop Sealtiel, ve Sealtiel yesuru azuwa tipoop Zerubabel. 13Zerubabel natu Abiut, Abiut natu Eliakim, ve Eliakim natu Azor. 14Azor natu Sadok, Sadok natu Akim, ve Akim natu Eliut. 15Eliut natu Eleasar, Eleasar natu Matan, ve Matan natu Yakop. 16Yakop natu Yosep. Yosep azuwa Maria to ipoop Yesu, ye to tiwaata tighaze Krisi + ne.

17Tovenen Abaraam natu Isak, Isak natu Yakop, ve siŋ todi tiparseŋgan di tovene itaghoni ila ila le imuul David ivot inim saaŋgul ve paaŋ (14). Ve sawa to David, le ila imuul sawa to yes Babilona tiyou yes Yuda ve tigham di tila tivot Babilon, nene siŋ to David tiparseŋgan di irau saaŋgul ve paaŋ (14) muul. Ve sawa to yes Yuda tipul Babilon ve timuul tila taudi ndug todi, le ila imuul sawa to Krisi tina ipoopa, nene siŋ to David tiparseŋgan di irau saaŋgul ve paaŋ (14).

Aŋela ivot to Yosep ve ipaloti

[Lu 2:1-7]

18Kamos to Yesu Krisi tina ipoopa, nene vene: Tina Maria, tisia pa ŋgeu eez, iza Yosep. Eemoghon yesuru tilup di sone, ve tighilaal tighaze Maria apo. Mbeb tonene ivot ila Avuvu Patabuaŋ tapiri. Lu 1:35

19Yosep, ye ŋgeu deŋia eez, ve lolo pa igham Maria varu ivot ighazooŋ maau. Tovenen mata iŋgal ighaze irab motin vaiuuŋ todi inim ŋgozaaŋ. 20Ighamgham ŋgar sone, ve Maaron aŋela toni ivot toni ila vibiiŋ, ve isaav pani ighaze: “Yosep, yom siŋ to David, umatughez pa ugham Maria inim azuwam malep. Pasa, tamtoghon to ineep ila ye apo, nene ivot pa Avuvu Patabuaŋ tapiri. 21Ye pale ipoop pain tamoot. Ve yom irau uwaat iza Yesu.

Pasa, ye pale igham mulin tamtoghon toni pa pataŋani to sosor todi.” + Lu 1:31, 2:21; Yo 1:29; Mbaŋ 4:12

22Mbeb tonenen tisob titaghon saveeŋ to muuŋ Maaron ivotia ila propet toni eez avo. Saveeŋ tovene:

23Aghita. Liva paghu eez to ivai sone pale apo, ve ipoop natu tamoot.

Pale tiwaat iza Imanuel.+Is 7:14

24Tovenen Yosep igheen le ndugizau, ghoro imundig ve itaghon saveeŋ to aŋela to Maaron isavia pani, ve igham Maria inim azuwa. 25Eemoghon igharaui maau le ye ipoop natu tamoot tonowen. Ve Yosep iwaat pain tonenen iza Yesu. Lu 2:7,21

Maaron Saveeŋ Toni Patabuaŋ

© 2011, Wycliffe Bible Translators, Inc. All rights reserved. More Info | Version Index